МОНГОЛ, ЧИЛИЙН ЗАЛУУЧУУДЫН ДУНД ПОДКАСТ УРАЛДААН ЗОХИОН БАЙГУУЛАГДАВ
ЭСЯ-ын Мэдээ , 2022-01-19 Монгол Улс, Бүгд Найрамдах Чили Улсын хооронд дипломат харилцаа тогтоосны 50 жилийн ойн хүрээнд хоёр орны ЭСЯ-д хамтран “Монгол орны тухай миний төсөөлөл”, “Чили орны тухай миний төсөөлөл” сэдэвт подкастын уралдааныг зарлаж, шилдэг бүтээлүүдийг шалгарууллаа. Монгол, Чилийн найрсаг харилцаа, хамтын ажиллагааг аялал жуулчлал, боловсрол, соёлын хүрээнд хоёр орны залуучуудын оролцоотойгоор орчин үеийн контентын төрөл болох подкастаар дамжуулан хүртээмжтэй түгээн таниулах, сурталчлах, хоёр орны иргэд харилцан мэдээлэл солилцох, судлах сэдлийг төрүүлэхэд уралдааны зорилго оршив.

Уралдаанд ирүүлсэн бүтээлүүдээс “Монгол орны тухай миний төсөөлөл” сэдвээр Чилийн Үндэсний Их сургуулийн оюутан Фернанда Санчес, Хуакин Саез нарын Монгол, Чили орны түүх, зан заншил, нийгэм, соёлын адил төстэй болон ялгаатай талуудыг оновчтой харьцуулан харуулсан бүтээл тэргүүн байрт шалгарсан бол Латин-Америкийн Анагаахын шинжлэх ухааны их сургуулийн оюутан Э.Түмэндэмбэрэл, Карлос нарын бүтээл “Чили орны тухай миний төсөөлөл” сэдвээр тэргүүлэв. Мөн МУИС-ийн Испани хэл, орон судлалын оюутан Б.Эрдэнэ, МУИС-ийн ОУХНУС-ийн оюутан Б.Бүрэнжаргал нарын бүтээл 2-3 дугаар байрыг эзлэлээ. Шилдэг оролцогчдын шагналыг Элчин сайд Ш.Батцэцэг, Чилийн Элчин сайд М.Уртадо нар цахим хэлбэрээр гардуулав.