КУБА ДАХЬ ДИПЛОМАТ ЭМЭГТЭЙЧҮҮД ЧУУЛАВ
ЭСЯ-ын Мэдээ , 2021-12-19 Элчин сайд Ш.Батцэцэгийн санаачилгаар Хавана дахь Азийн Дипломат Эмэгтэйчүүдийн Холбоо Нэгдсэн Үндэстний Байгууллагын Хүн амын сантай хамтран 2021 оны 12 дугаар сарын 17-ны өдөр “Women in Diplomacy” Олон улсын семинарыг зохион байгуулав. Кубад үйл ажиллагаа явуулж буй Дипломат төлөөлөгчийн газрууд, Олон Улсын байгууллагуудын төлөөлөл бүхий 30 гаруй орны дипломатууд оролцсон тус арга хэмжээний үеэр дипломат албанд хүчин зүтгэж буй эмэгтэйчүүдийн үүрэг оролцоо, манлайлал, жендерийн тэгш байдал зэрэг асуудлаар дэлгэрэнгүй хэлэлцүүлэг өрнүүлэв.

НҮБ-ын Хүн амын сангийн Суурин төлөөлөгчийн орлогч, Куба улсаас ЮНЕСКО-д суугаа суурин төлөөлөгч, Ангол, Гамби, Индонез, Монгол, Норвеги, Румын, Уругвай, Ямайка улсын Элчин сайд нар болон Кубын ГХЯ-ны харьяа Олон улсын бодлого судлалын хүрээлэнгийн судлаач нар 6 сэдвээр илтгэл тавьж оролцлоо. Семинарыг Норвегийн Хаант Улсаас БНКУ-д суугаа Элчин сайд хатагтай Беате Стиро, Элчин сайд Ш.Батцэцэг нар удирдан явууллаа. Хавана дахь дипломат эмэгтэйчүүдийн хоорондын хэлхээ холбоог нэмэгдүүлэх, харилцан туршлага солилцох үр өгөөжтэй арга хэмжээ болж өндөрлөв.